നാലുകെട്ട്

മുത്തശ്ശാ ഇവിടെ കരടി ഇറങ്ങി --[അച്ചു ഡയറി -123 ]

        മുത്തശ്ശാ അച്ചുവിൻറെ വെക്കേഷൻ "സ്പോയിൽ "ആയി .അമേരിക്കയിൽ അച്ചുവിൻറെ "കംമ്യൂണിറ്റിയിൽ "കരടി ഇറങ്ങി . കുട്ടികൾ പുറത്തിറങ്ങരുതെന്ന് പോലീസ് പറഞ്ഞിരിക്കുകയാ .എങ്ങിനെയാ ഇനി പുറത്തുപോയി കളിക്കാ .ഫ്രണ്ടസ്സ് എല്ലാവരും കൂടി കളിക്കാൻ പ്ലാനിട്ടിരുന്നതാ . ഇനി എന്താ ചെയ്യാ ?. വലിയ കരടിയാണന്നാ പറഞ്ഞേ . മൗഗ്ലിയുടെ കൂട്ടുകാരനായിരിക്കും .എന്നാൽ പേടിക്കാനില്ല .അവൻ കുട്ടികളെ ഉപദ്രവിക്കില്ല . അടുത്ത കാട്ടിൽ നിന്ന് വഴി തെറ്റി വന്നതാവും . അതുവേഗം കാട്ടിലേക്ക് പോയാൽ മതിയായിരുന്നു . പുറത്ത് വാതിൽ തുറന്നിടാനും പേടിയാ .വീടിനകത്ത് കയറിയാലോ ? പോലീസ് പിടിച്ചാൽ ചിലപ്പോൾ "സൂ " വിൽ ആക്കും .അത് വേണ്ടായിരുന്നു .അവൻറെ അമ്മക്കും അച്ഛനും സങ്കടാവില്ലേ ? അതിനെ വെടിവച്ചു കൊല്ലണംന്നാ ഫ്രണ്ട്സ്‌ പറയുന്നേ .പാവം അത് വേണ്ടാ .     

          പക്ഷേ ഇന്നലെ അച്ചൂന് സങ്കടായി . ആ കരടിയെ ഒരു വണ്ടി ഇടിച്ചു . അത് ചത്തുപോയി !.കൂട്ടുകാർക്കൊക്കെ സന്തോഷായി  കളിക്കാൻ വിളിച്ചതാ .പക്ഷേ അച്ചുവിന് ഇന്ന് കളിക്കാൻ തോന്നണില്ല   . ആ പാവം കരടി ചാകണ്ടായിരുന്നു .