നാലുകെട്ട്

   ..വംശവൃക്ഷത്തിൻറെ വേരുകൾ .....[നാലുകെട്ട് -ഭാഗം 12 ]

   ഈ തറവാടിന്റെ വേരുകൾ കണ്ടെത്തണം .പഴക്കം അറിയണം .താളിയോലയിലുള്ള ഒരു "പ്രശ്ന ചാർത്ത് " കുറച്ച് സഹായിച്ചു . മംഗലാപുരത്തുള്ള "ബയ്സൽ മിഷൻ "കമ്പനിയുടെ ഓടും തറയോടും ആണ് നാലുകെട്ടിൻറെ പണിക്കുപയോഗിച്ചിരുന്നത്. 165 -വർഷത്തെ പഴക്കമുണ്ട് അതിന് . പോരാ ഇനിയും ആഴങ്ങളിലേക്ക് പോകണം .അപ്രതീക്ഷിതമായി ആണ്  ആ വിളിവന്നത് .പ്രസിദ്ധചരിത്രകാരനായ മാത്യു താമരക്കാടിൽ നിന്നായിരുന്നു. നാലുകെട്ടിൻറെ പഴക്കം നിശ്ചയിക്കാനുള്ള ഒരു പാട്ടചീട്ട് അദ്ദേഹത്തിന്റെ കൈവശം ഉണ്ടത്രെ .ഉണ്ണി നേരേ കോഴിക്കൊട്ടെയ്ക്ക് .അന്നദ്ദേഹം കോഴിക്കോട് ദേവഗിരി കോളേജ് പ്രഫസർ .

        അദ്ദേഹം ഒരു ഓലക്കെട്ട് എൻറെ കൈയിൽ തന്നു .500 -വർഷം പഴക്കം .ഒരു മഹത്തായ അടിയാൻ കുടിയാൻ ബന്ധത്തിൻറെ ചുരുളവിടെ അഴിയുന്നു . "കാലനിർണ്ണയത്തിനതീതമായി ഇതിൽ പലതുമുണ്ട് . അങ്ങയുടെ പൂർവസൂരികൾ ആരോ എൻറെ അപ്പനപ്പൂപ്പന്മാർക്ക് ആർക്കോ എഴുതിക്കൊടുത്ത ഒരു പാട്ടചീട്ട് .! ഇതൊരു "ഈക്വൽ എഗ്രിമെന്റാണ് ".രണ്ടു കക്ഷികൾക്കും തുല്യ പ്രാധാന്യം .ഇതു നിങ്ങളുടെ പൂർവികരുടെ സംസ്ക്കാരത്തെ ആണ് കാണിക്കുന്നത് .500 -വർഷം മുമ്പുള്ള ഒരു നമ്പൂതിരിയും ക്രിസ്ത്യാനിയും തമ്മിലുള്ള സൌഹൃദ രേഖ . "..ഉണ്ണി അത്   കയ്യിൽ വാങ്ങി .  അവൻറെ കൈ വിറച്ചു .കാലപ്പഴക്കത്തിൽ നശിക്കാത്ത ഉണ്ണിയുടെ വംശവൃക്ഷത്തിൻറെ വേരുകൾ ! .അവനതിൽ മുഖം ചേർത്ത് അമർത്തി .ഒരു കാലാന്തരയാത്രയുടെ അനുഭൂതി . "നല്ല മലയാളമല്ല ",കൊട്ടെഴുത്ത് " ആണ് .ഇതെന്റെ ചരിത്ര ശേഖരത്തിൽ ഉണ്ടാകും . ഒരിക്കലും നഷ്ട്ടപ്പെടാതെ ."അതദ്ദേഹത്തെ മനസില്ലാമനസോടെ ,എന്നാൽ തികഞ്ഞ നന്ദിയോടെ അത്  തിരിച്ചേൽപ്പിച്ചു .