നാലുകെട്ട്

          സപ്രമഞ്ചക്കട്ടിൽ -[നാലുകെട്ട് -15 ]

            നാലുകെട്ടിൻറെ അറയുടെ പുറകുവശത്തു ഒരു കിടപ്പുമുറിയുണ്ട്  . "ഒഴുകാരം "എന്നാണ് നമ്മൾ പറയാറ് .ആ മുറിയിലായിരുന്നു ആ സപ്രമഞ്ചകട്ടിൽ . നല്ല വണ്ണമുള്ള കാലുകൾ . അതിൻറെ ശിൽപ്പ ചാതുരി മനോഹരം .കട്ടിലിനു മുകളിലായി കാലുകളിൽ തുള ഇട്ടിരിക്കും .കുറിയവശത്തെ കൊത്തുപണികളോടുകൂടിയ അഴികൾ .അതിൽ ചലിപ്പിക്കാവുന്ന മനോഹരമായ കട്ടകൾ നാലുകാലുകലുടെ യും  മുകളിൽ നിന്ന് മേൽക്കട്ടിയിലെക്കുള്ള തൂണുകൾ . മേൽക്കട്ടി .ഔഷധ ഗുണമുള്ള മരങ്ങളാണ് ഉപയോഗിച്ചിരിക്കുന്നത് . അതിനുപയോഗിച്ചിരിക്കുന്ന പെയിന്റ് ആണൽഭുതം .പ്രകൃതി ദത്തമായ സസ്യ ചാറൂകളും  മറ്റും ചേർത്തുണ്ടാക്കുന്ന ഒരുതരം പ്രത്യേക മാന്ത്രികക്കൂട്ട്‌ . കാലപ്പഴക്കം കൊണ്ട് അതിന് ഒരു മങ്ങലും ഏറ്റിട്ടില്ല .

     നല്ല വൃത്തത്തിൽ മിനുക്കി എടുത്ത നാലുകല്ലുകളിൽ  ആണ് കാലുകൾ ഉറപ്പിച്ചിരിക്കുന്നത് . ആ കല്ലുകളുടെ അരുകിൽ ചാലുകൾ കീറിയിട്ടുണ്ട് . ആചാലുകളിൽ വെള്ളം ഒഴിച്ചിരിക്കും .ഉറുമ്പ്‌ കയറാതിരിക്കാനുള്ള മുൻകരുതൽ ..ആ മുറി തറയോടുമാറ്റി സിമിന്റിട്ടത് ഇന്നും ഓർക്കുന്നു .സിമിന്റ് ഉണങ്ങുന്നതിന് മുമ്പ് എൻറെ അമ്മ ചവിട്ടിയപ്പോൾ ഉണ്ടായ കാലടിപ്പാട് ഇന്നും ഇവിടുണ്ട് .അന്നതുമാറ്റാൻ ഞാൻ സമ്മതിച്ചില്ല ..പിൽക്കാലത്ത്‌ ആ കാൽപ്പാടുകൾ ആണ് എൻറെ എല്ലാ ഭാഗ്യ ചുവടുവയ്പ്പുകൾക്കും പ്രചോദനമായത് .എൻറെ പ്രിയപ്പെട്ട അമ്മയുടെ ദീപ്തമായ ഓർമ്മയോടെ ഞാൻ ആ സപ്രമഞ്ചൽ കട്ടിലിൽ ഇരുന്നു