നാലുകെട്ട്

...കളമെഴുത്ത് പാട്ട് ----[നാലുകെട്ട് 22 ]

         നാലുകെട്ടിൻറെ തളത്തിലാണ് കളമെഴുത്ത് .കുട്ടിക്കാലത്ത് അതോരുത്സവമാണ് .ബാലക്കുറൂപ്പ് ചെണ്ടയും ,ചെങ്ങിലയും ആയി വരുമ്പോൾ തന്നെ മനസ്സിൽ ഉൽസാഹകമാവും .  ആദ്യം കെട്ടിവിദാനമാണ്.    കുരുത്തോല ,ആലില ,വെറ്റില ,പൂക്കില .മാവില  ഇവകൊണ്ടാണ് അലങ്കാരം . ഭദ്രകാളി നടുക്കും ,രണ്ടുവശത്തും യക്ഷിയും ,ശാസ്താവും . ആദ്യം അരിപ്പൊടികൊണ്ട്‌  "ആയുർ രേഖ " വരയ്ക്കുന്നു . അതിന് ശേഷം പ്രകൃതിദത്തമായ അഞ്ചുതരം പൊടികൾ കൊണ്ടാണ് കളമെഴുത്ത് . കറുപ്പ് ,വെള്ള ,പച്ച ,മഞ്ഞ ,ചുവപ്പ് .ഈ പഞ്ചവർണ്ണപ്പോടികൾ കൊണ്ട് തീർക്കുന്ന കളം അത്ഭുതത്തോടെ നോക്കി നിന്നിട്ടുണ്ട് . ഭദ്രകാളിയുടെയും ,യക്ഷിയുടേയും ഭീകര രൂപം പതുക്കെ പതുക്കെ ഉരുത്തിരിഞ്ഞ്‌ വരും .അന്ന് ആ ഭീകര ദംഷ്ട്രങ്ങൾ ഭയം ജനിപ്പിച്ചിരുന്നു . അരിപ്പൊടികൊണ്ട്  അതിരുവരച്ചു ചുറ്റും അക്ഷദവും പൂക്കിലയും നാളികേരവും വച്ച് അലങ്കരിക്കുന്നു .

          നന്തുണി കൊട്ടി ദേവസ്തുതി പാടുന്നു . പിന്നെ കളം പൂജ . മുറ്റത്ത്‌ അഞ്ച് വാഴപ്പിണ്ടികൾ നിരയായി ഉറപ്പിച്ചിരിക്കും . സന്ധ്യക്ക്‌ അതിൽ പന്തവും ,കൊൽത്തിരിയും കത്തിച്ച് പൂജിച്ച് പ്രദക്ഷിണം വച്ച് വീൺ ഡും  തളത്തിലേക്ക്‌ . കർപ്പൂരം കത്തിച്ച് ദീപാരാധന . കുറുപ്പ്  വലംതലയിൽ കൈ കൊണ്ട് താളത്തിൽ കൊട്ടി കളമെഴുത്ത്പാട്ട് . പതിഞ്ഞ ശബ്ദത്തിലുള്ള  ആ പാട്ട് ഇന്നും ചെവിയിൽ മുഴങ്ങുന്നു . അവസാനം കുരുത്തോലകൊണ്ട് കളം മായ്ക്കുന്നു . മാറിടം ഒഴിച്ച് .അന്ന് ആ മനോഹരരൂപം മാച്ച് വിക്രുതമാക്കുംപോൾ കുരുപ്പിനോട് ദ്വേഷ്യം തോന്നിയിട്ടുണ്ട് .