നാലുകെട്ട്

ലോനപ്പന്റെ മക്കൾ [ കീശക്കഥ - 69 ]

രണ്ട് ആഡംബരക്കാറുകൾ റിസോർട്ടിന്റെ മുറ്റത്ത് നിർത്തി. ഫുൾ സ്യൂട്ടിൽ നാലഞ്ചു പേർ. ഡോക്ട്ടറെക്കാണണം. പിന്നെ ഈ സ്ഥാപനത്തിന്റെ ഉടമസ്ഥനേം. അവരെ സ്വീകരിച്ച കത്തിരുത്തി.
"ഞങ്ങൾ എന്താണ് ചെയ്തു ത ര ണ്ടത്. "
"ഞങ്ങളുടെ ഡാഡിക്ക് സുഖമില്ല.പ്രായമായി. എഴുനേറ്റു നടക്കാൻ വയ്യാ. ഡാ ഡി യു ടെ അ വ സാ നകാലം സുഖകരമാകണമെന്നുണ്ട്. ചികിത്സക്കായി ഇവിടെ അഡ്മിറ്റ് ചെയ്യണം. എത്ര ദിവസമായാലും കുഴപ്പമില്ല. കാഷും ഒരു പ്രശ്നമല്ല." 
അങ്ങിനെയാണ് ലോനപ്പൻ ഇവിടെ വന്നത്. പാവത്തിന് നടക്കാൻ വയ്യ. പല അസുഖങ്ങളും ഉണ്ട്.
" അപ്പന്റെ കൂടെ ആരുമില്ല. ഞങ്ങൾ ആറു മക്കളും കുടുംബ സഹിതം അമേരിക്കയിൽ ആണ്. നിങ്ങൾ അപ്പനെ ചികിത്സിക്കണം എത്ര ദിവസമായാലും കുഴപ്പമില്ല. അച്ഛനെ അനാഥാലയത്തിൽ ആക്കുന്നത് നമുക്ക് മോശമാണ്. അവർ ഒരു ലക്ഷം രൂപയുടെ ഒരു കെട്ടെടുത്ത് മേശപ്പുറത്തു വച്ചു.
അവരുടെ രീതി ഇഷ്ടപ്പെട്ടില്ലങ്കിലും പാവം ലോനപ്പന്റെ ദൈന്യത കണ്ടപ്പോൾ കഷ്ടം തോന്നി. അങ്ങിനെ ലോനപ്പനെ അവിടെ അഡ്മിററുചെയ്ത് മക്കൾ വിദേശത്തേക്ക് പറന്നു.
ലോനപ്പന് അവർ നല്ല ചികിത്സ കൊടുത്തു. സ്നേഹംകൊടുത്തു. ഇഷ്ടമുള്ള ആഹാരം കൊടുത്തു. ഇന്ന് ലോനപ്പൻ ആരോഗ്യ വാനാണ്. അസുഖം മുഴുവൻ മാറി .
"ഇപ്പോൾ അസുഖമൊക്കെ മാറിയില്ലേ നാളെ ഡിസ്ചാർജ് ചെയ്താലോ? മക്കളെ വിളിക്കട്ടെ വീട്ടിൽ പ്പൊക്കോളൂ."
"കൊട്ടാരസദൃശം മക്കൾ പണി കഴിപ്പിച്ച ആ വീട്ടിലേക്കോ.? എനിക്കവിടെ ആരുമില്ല. ചിലപ്പോൾ അവർ അതു വാടകക്ക് കൊടുത്തു കാണും പിന്നെ എന്നെ ഇവിടുന്ന് ഡിസ്ചാർജ് ചെയ്യാൻ അവർക്ക് ആ ഗ്രഹവും ഉണ്ടാകില്ല. സംശയമുണ്ടങ്കിൽ അങ്ങ് മക്കളെ വിളിച്ചു നോക്കൂ.
"പപ്പക്ക് അസുഖം മാറി എന്നോ?മരിക്കാറായി എന്നാണ് ഞങ്ങൾ വിചാരിച്ചത്. അതു കുഴപ്പായല്ലോ. ഞങ്ങൾക്കിപ്പം വരാനും പറ്റില്ല. ഒരു വർഷം കൂടി പപ്പയെ അവിടെത്താമസിച്ചു ചികിത്സിക്ക്യൂ.എത്ര രൂപാ വേണമെങ്കിലും "
അതു പൂർത്തിയാക്കും മുമ്പ് ഡോക്ടർ ഫോൺ കട്ടു ചെയ്തു. ഇങ്ങിനെയുണ്ടോ മക്കൾ.!
"എന്റെ ബാക്കി ജീവിതത്തിന് മക്കൾ വിലപറഞ്ഞു അല്ലേ."ലോനപ്പൻ ചിരിച്ചു.ദുഖത്തിൽപ്പൊതിഞ്ഞ ഒരു ചിരി.