മലയാള ഭാഷക്കൊരു പ്രവാസി കൂട്ടായ്മ - കെ.സി.എസ് കളരി [അമേരിക്ക-121 ] അമേരിക്കൻ യാത്രയിലെ ഹൃദ്യമായ അനുഭവങ്ങൾ അനവധിയാണ്.കഴിഞ്ഞ ദിവസം മേരിലാൻ്റിൽ "കെ.സി.എസ് കളരി "യുടെ വാർഷികത്തിൽ വിശിഷ്ടാതിഥി ആയി പ്പങ്കെടുക്കാനവസരം കിട്ടി. സത്യത്തിൽ അവിടെ ചെന്നപ്പോൾ അൽഭുതപ്പെട്ടു പോയി.കെ.സി.എസ് എന്ന പ്രവാസി കൂട്ടായ്മ്മ കഴിഞ്ഞ പതിനഞ്ച് വർഷമായി പ്രവാസികളുടെ കുട്ടികളെ മലയാളം പഠിപ്പിക്കാൻ "കെസിഎസ് കളരി " എന്നൊരു സംരംഭം ഭംഗി ആയി നടത്തി വരുന്നു. ഇവിടെത്തന്നെ മൂന്നു ചാപ്റ്ററുകളിലായി ഇരൂനൂറോളം കുട്ടികളെ മാതൃഭാഷ പഠിപ്പിക്കുന്നുണ്ട്. ഇരുപതോളം ടീച്ചേഴ്സ് അവരുടെ എല്ലാത്തിരക്കിനിടയിലും ഇവർക്ക്സൗജന്യമായി ക്ലാസ് എടുക്കുന്നുണ്ട്. അവരുടെ അർപ്പണബോധത്തിന് ആദരവ് അർഹിക്കുന്നു. കെ സി എസ്‌ കളരിയുടെ അടുത്ത ലവൽ സർട്ടിഫിക്കേഷൻ കോഴ്സ് " കണിക്കൊന്ന " അടുത്തത് "സൂര്യകാന്തി " ഡിപ്ലോമാ കോഴ്സ്.. അതിൽ പാസാവുന്നവർക്ക് കേരളാ ഗവന്മേൻ്റ് അംഗീകൃത മലയാളംമിഷൻ സർട്ടിഫിക്കറ്റ് ലഭിക്കുന്നു." സീൽ ഓഫ്ബൈലിറ്ററസി " യോഗ്യതാ പരീക്ഷ പാസാകുന്നവർക്ക് യൂണിവേഴ്സിറ്റിയിൽ നിന്ന് സർട്ടിഫിക്കറ്റ് ലഭിക്കും. കേരളാ മലയാള മിഷനിൽ രജിസ്റ്റർ ചെയ്താണ് ഈ സംരംഭം അവർ തുടരുന്നത്. ഇതൊക്കെ ഈ അമേരിക്കയിൽ കുറച്ചു പേരുടെ അർപ്പണബോധം കൊണ്ടാണ് നടത്തുന്നത്. കെ സി എസ് എന്ന പ്രവാസി സംഘടനയുടെ ശക്തമായ പിന്തുണയും ഇതിനുണ്ട്. കെ.സി.എസ് കളരിയുടെ എല്ലാമെല്ലാമായ ബീനാ ടോമിയാണ് എന്നെ ക്ഷണിച്ചത്‌. നാട്ടിൽ തൊടുപുഴയാണവരുടെ സ്വദേശം. പിന്നെ അതിൻ്റെ പ്രസിഡൻ്റ് ശ്രീ.അനീഷ്.ഇവരുടെ ഒക്കെ പ്രവർത്തനം കാണുമ്പോൾ നമുക്ക് നാട്ടിൽപ്പോലും ഇങ്ങിനെ ഒന്നു ചെയ്യാൻ പറ്റുന്നില്ലല്ലോ എന്ന കുറ്റബോധം തോന്നി പത്തു വർഷം മുമ്പ് എൻ്റെ അച്ചുവിൻ്റെ ഡയറി ഇവിടെ അച്ചുതന്നെ പ്രകാശനം ചെയ്തപ്പോൾ ഈ സംഘടനയെപ്പററി കേട്ടിരുന്നു. അന്ന് ആ പുസ്തകത്തിൽ എല്ലാവരും ഓട്ടോ ഗ്രാഫ് തന്നപ്പോൾ ഒരു കൊച്ചു കുട്ടി മാത്രം നല്ല മലയാളത്തിലാണ് എഴുതിത്തന്നത് 'അനഘ .ഈ കളരിയിൽ നിന്നാണന്നു മലയാളം പഠിച്ചതെന്ന് പറഞ്ഞിരുന്നു.ഇത്രയും വലിയ ഒരു പ്രസ്ഥാനമാണിതെന്ന് അന്നു മനസിലാക്കിയില്ല.കെ.സി.എസിൻ്റെ വിപുലമായ പ്രവർത്തന മേഘലയിൽ ഒന്നു മാത്രമാണ് ഈ കളരി. കേരളത്തിലെ പ്രധാനപ്പെട്ട എല്ലാഎഴുത്തുകാരിലൂടേയും കൃതികൾ സന്നിവേശിപ്പിച്ച കുട്ടികളുടെ പരിപാടികൾ അനുപമമായിരുന്നു. ആ സംഘടനയുടെ നിലവാരം വിളിച്ചോതുന്ന ഒരു പരിപാടി ആയി അത് മാറിയിരുന്നു. അഭിമാനം തോന്നി, ആദരവ് തോന്നി. പരിപാടികൾ മുഴുവൻ കഴിഞ്ഞാണവിടുന്ന് പിരിഞ്ഞത്