മുത്തശ്ശൻ്റെ മന്ത്രപ്പൂട്ട്: [ അച്ചു ഡയറി-432]മുത്തശ്ശാ അമേരിയ്ക്കയിൽ അച്ചൂൻ്റെ വീടിന് ഇൻറർനെറ്റ് ലോക്കാ.അച്ഛൻ രഹസ്യമായി പാസ് വേർഡ് അച്ചൂന് തന്നിട്ടുണ്ട്. ആരോടും ഷയർ ചെയ്യരുത് എന്നു പറഞ്ഞിട്ടുണ്ട്.അച്ചു പറയില്ല. കൂട്ടുകാർ ഒത്തു വന്നാലും അവരെ മാറ്റി നിർത്തിയാ തുറക്കാറ്. പക്ഷേ പാച്ചു അവൻ ഭയങ്കരനാ അവൻ അടുത്ത് വന്നു് ആ നമ്പർ കണ്ടു പിടിച്ചു.അച്ഛനോട് പറയണം.അവൻ കൊച്ചു കുട്ടിയല്ലേ. അവൻ്റെ മനസിൽ ഇരിയ്ക്കില്ല.നാട്ടിലെ മുത്തശ്ശൻ്റെ മന്ത്രപൂട്ടുകളാണ് അച്ചൂന് ഓർമ്മ വന്നത്. ഒന്നു മണിച്ചിത്രത്താഴ് .അത് പൂട്ടിയാലും അതിൽ ഒരു സൂത്രപ്പണിയുണ്ട്.ഒരു ചെറിയ കഷ്ണം അതിൻ്റെ ഓടമ്പലിലേയ്ക്ക് തള്ളിവയ്ക്കാം. അതാരും കണ്ടില്ല. താക്കോലിട്ട് തുറന്നാലും പൂട്ട് തുറക്കാൻ പറ്റില്ല. പക്ഷേ എന്തു വലിയ കീ ആണ് മുത്തശ്ശാ. പിന്നെ കോൽത്താഴ്. അതൊരൽഭുതം തന്നെയാണ്. ചുററുകളുള്ള ഒരു ഇരുമ്പ് കുറ്റി.അതിൽ പുറത്തേക്ക് വളഞ്ഞിരിയ്ക്കുന്ന കമ്പി കോർത്താണ് പൂട്ടുന്നത്.ആ കുറ്റിയ്ക്കടിയിൽ ഒരു ചെറിയ ഹോൾ ഉണ്ട്. അതിൽ.ക്കൂടി "ടി "ആകൃതിയിൽ ഉള്ള ഒരു കമ്പിയിട്ടാണ് തുറക്കുക .അതാണ് അതിൻ്റെ കീ. അച്ചൂന് ഇതൊക്കെ അത്ഭുതമാണ്.അടുത്ത അൽഭുതം മുത്തശ്ശൻ്റെ നിലവറയുടെ താക്കോൽ ആണ്.അതിൽ അഞ്ച് പൂട്ടാണ്. ഒരു താക്കോൽ കൊണ്ട്. അത് വലത്തു വശത്തേക്കും ഇടത്തുവശത്തേയ്ക്കും തിരിച്ച് അകത്തേക്കിറക്കിയാണ് പൂട്ടുക. ഒരോ പൂട്ട് വീഴുംമ്പഴും താക്കോൽ പുറത്തെടുത്ത് ഒരു പ്രത്യേക ക്രമത്തിൽ പ്പുറത്തെടുത്താണ് പൂട്ടുക .ആ ക്രമം ആണതിൻ്റെ സീക്രട്ട്. അതു തെറ റിയാൽ ഒന്നു തുറക്കുമ്പോൾ അടുത്ത പുട്ട് വീഴും. അവസാനം കാതടപ്പിയ്ക്കുന്ന ഒരലാറമുണ്ട്. എൺമ്പത് വയസായ ഒരു മുത്തശ്ശനാണ് ഇതുണ്ടാക്കിത്തരുന്നത്.ഗോദറേജ് കമ്പനി വരെ തോറ്റു പോകും ആ പഴയ ടക്കനോളജിയ്ക്ക് മുമ്പിൽ .പിന്നെ പൂജാമുറിയിലെ നമ്പർ ലോക്കാണ്.ഒരു മലയാളം വാക്കാണ് അതിൻ്റെ പാസ് വേർഡ്. അതു ക്രമത്തിൽ വച്ചാലേ തുറക്കാൻ പറ്റൂ. ആ പാസ് വേർഡും മുത്തശ്ശൻ അച്ചൂന് മാത്രം പറഞ്ഞു തന്നിട്ടുണ്ട്. അതൊന്നും അച്ചു ആരോടും ഷെയർ ചെയ്യില്ല ,എന്നാലും അച്ചു നോട് പറയണ്ടായിരുന്നു. സീക്രട്ട് സൂക്ഷിയ്ക്കാൻ വലിയ പാടാ. ആരോട് എങ്കിലും പറയണന്നു തോന്നും അവസാനം അച്ചു ജോബിനോട് മാത്രം പറഞ്ഞു. അവനിതൊന്നും വിശ്വസിക്കാൻ പറ്റണില്ല.ഇൻഡ്യയിൽ അവൻ ഒരിയ്ക്കലും വരില്ലന്നച്ചൂ ന റിയാം.പിന്നെ നമ്പർ ലോക്കിൻ്റെ പാസ് വേർഡ് മലയാളമല്ലേ.അതവന് ജീവിതത്തിൽ പഠിക്കാൻ പറ്റില്ല എന്നച്ചൂന് ഉറപ്പാ. എന്നാലും പറയണ്ടായിരുന്നു. പറഞ്ഞു പോയിഎന്നു മുത്തശ്ശനോട് പറയണം.അല്ലങ്കിൽ ചീറ്റി ഗ് ആകും.