കർണ്ണശപഥത്തിൽ കുന്തി ആയി ശ്രീ .ബാബു നമ്പൂതിരി.... ആസന്നമായ മഹാഭാരത യുദ്ധം. ദുര്യോധന ൻ്റെ വാമഭാഗം ഭാനുമതിയേ സമാധാനിപ്പിച്ച് കർണ്ണൻ ഗംഗാതീരത്തെത്തുന്നു. പതിവ് പ്രാർത്ഥനക്ക്. കർണ്ണൻ്റെ മനസും കലുഷമാണ്.അകാരണമായ ഒരു വിഷാദം."എന്തി ഹ മൻ മാനസേ ...'' വിഷാദ മഗ്ദനായിരിക്കുന്ന കർണ്ണൻ്റെ അടുത്തേക്ക് ദൂരെ നിന്ന് ഒരു സ്ത്രീരൂപം അടുത്ത വരുന്നത് കർണ്ണൻ ശ്രദ്ധിക്കുന്നു... അടുത്തു വന്നപ്പോൾ കർണ്ണന് അത്ഭുതമായി. കുന്തീദേവി. പാണ്ഡവരുടെ അമ്മ. മഹാഭാരതത്തിലെ ഏറ്റവും നാടകീയമായ, ആത്മ സംഘർഷം നിറഞ്ഞ നിമിഷമായി ആസമാഗമം. കൗരവരെ ഉപേക്ഷിച്ച് കർണ്ണൻ യുദ്ധത്തിൽ പാണ്ഡവരുടെ പക്ഷം ചേരണം അതാണ് കുന്തി ദാനമായിആവശ്യപ്പെട്ടത്. തൻ്റെ എല്ലാമെല്ലാമായ ദുര്യോധനനെ ഉപേക്ഷിച്ച് വരില്ലന്നു കർണ്ണൻ തീർത്തു പറഞ്ഞു. അവസാനം കുന്തി ആ സത്യം വെളിപ്പെടുത്തുന്നു. ഇതു വരെ ആരോടും പറയാത്ത ആ രഹസ്യം."ഓതുന്നേൻ ഒരു സത്യംതാതൻ നിനക്കടോ ആദിത്യ ദേവനല്ലോമാതാവ് ഞാനുമത്രേ." കർണ്ണൻഞട്ടിത്തെറിക്കുന്നു. യുദ്ധാനന്തരം അമ്മക്ക് അഞ്ചു പുത്രന്മാർ ജീവനൊടുണ്ടാകും എന്നുറപ്പുകൊടുക്കുന്നു. അർജ്ജുനനെ അല്ലാതെ മററു പാണ്ഡവരെ കൊല്ലില്ലന്നും. കുറിച്ചിത്താനം പൂതൃക്കോവിലിൽ ഏകാദശി വിളക്കിനൊടനുബന്ധിച്ച് കഥകളി.കർണ്ണശപഥം. സർവ്വകലാവല്ലഭനായ ശ്രീ.ബാബു നമ്പൂതിരിയാണ് കുന്തിയുടെ വേഷം ചെയ്യുന്നത് .ഈ ഇടെ കഥകളിയിൽ സജീവമായ അദ്ദേഹത്തിൻ്റെ സ്ത്രീവേഷം ആദ്യമാണ്. ഈ പ്രായത്തിലും അരങ്ങിനോടുള്ള അദ്ദേഹത്തിൻ്റെ അടങ്ങാത്ത അഭിവാഞ്ച അൽഭുതപ്പെടുത്തുന്നു. സിനിമയിലെ അവസരങ്ങൾ പലതും വേണ്ടന്നു വച്ചാണ് അദ്ദേഹം ഇപ്പോൾ കഥകളിയിൽ ശ്രദ്ധിക്കുന്നത്.ആ സമ്പൂർണ്ണ കലാകാരൻ്റെ അർപ്പണ മനോഭാവത്തിന് സാഷ്ട്ടാംഗ നമസ്ക്കാരം.കലാമണ്ഡലം ഭാഗ്യ നാഥുമായുള്ള ആ രംഗത്തിനായി കഥകളി പ്രേമികൾ കാത്തിരിയ്ക്കുന്നു.പി.ഡി.നമ്പൂതിരിയും, കാഞ്ഞിരക്കാട് നാരായണനും, കുറൂരും, മാർഗ്ഗി നാരായണനും ഒക്കെ ഒത്തുചേരുമ്പോൾ ഒരു നല്ല കഥകളി അനുഭവമായി അത് മാറും.