ചുളുക്കുറ്റിയും സാക്ഷയും [നാലുകെട്ട് -351] പഴയ നാലുകെട്ടിൻ്റെ വസ്തു പരിശോധിക്കാൻ രസമാണ്.എൻ്റെ വാസസ്ഥലം ഒരു നാലുകെട്ടാണ്. പതിനെട്ട് കതകുകൾ ആയിരുന്നു പുറത്തേയ്ക്ക്.വിജാഗിരിക്കു പകരം " ചുളുക്കുറ്റി "യാണ് കതകുകൾക്ക് .നല്ല കനമുള്ള തടി അർദ്ധവൃത്താകൃതിയിൽ മുറിച്ച് പണിത് ആപ്പ് വച്ച് കട്ടിളയിൽ ഉറപ്പിക്കുന്നു. നല്ല ഘനമുള്ള പല കകളാണ് കതകിന് .മുകൾ ഭാഗത്ത് ഈ ചുളുക്കറിയിൽ കയറി തിരിയാൻ പാകത്തിന് കതക് തുളച്ച് അതിൽ കോർത്ത് ഉറപ്പിക്കുന്നു. രണ്ടു വശവും ഉറപ്പിക്കുന്നു. രണ്ടു പാളിക്കതകിൽ ഒന്നിൻ്റെ ഒരു വശം പൊഴിച്ചെടുക്കും. മറ്റേ ക്കതകിൻ്റെ വശം ഈ പൊഴിയിൽ കൃത്യം കയറാൻ പാകത്തിന് പ്രൊജക്റ്റ് ചെയ്തു നിൽക്കും. കതക് എയർടൈററായി അടയ്ക്കാൻ ഇത് സഹായിക്കും. കതകിൻ്റെ ചുവട് കട്ടിളയിൽ രണ്ടു അററത്തുംപടിയിൽ തുളച്ച് കതകിൻ്റെ പുഛം അതിൽ കയറി ഉറപ്പിക്കുന്നു. നല്ല വണ്ണം തുറക്കാനും അടയ്ക്കാനും എളുപ്പമാക്കുന്നു. കതകിൻ്റെ പുറവശം മണി ചിത്രത്താഴും അക വശം സാക്ഷയുമാണ്. ചുവട്ടിലും മുകളിലുമായി രണ്ട് സാക്ഷകൾ വിപരീത ദിശയിൽ ആണ് പണിയുന്നത്. സാക്ഷ രണ്ടും ഇട്ടാൽ നല്ല ഉപ്പുള്ള കതകായി അത് മാറുന്നു.അതു തറക്കുമ്പോൾ ഉള്ള "കറകറ " ശബ്ദം നാലുകെട്ടിൻ്റെ ഉണർത്തുപാട്ടായി അനുഭവപ്പെടും. മേൽപ്പറഞ്ഞ പതിനെട്ട്കതകിൻ്റെയും കിട്ടിളകൾ മുകളിൽ ഉത്തരത്തിൽ കോർത്ത് ഉറപ്പിച്ചിരിയ്ക്കും. വേറൊരു തരത്തിൽപ്പറഞ്ഞാൽഭിത്തി മുഴുവൻ പൊളിച്ചുമാറ്റിയാലും നാലുകെട്ട് അതേപടി നിൽക്കും.ചെറിയ മാറ്റങ്ങൾ വരുത്തി നാലുകെട്ട് ഇന്നും അതേപടി സംരക്ഷിച്ചിരിക്കുന്നു.