അച്ചൂ നും കൊറോണാ [അച്ചു ഡയറി-453] മുത്തശ്ശന് കൊറോണ ഭയങ്കര പേടിയാണെന്നു തോന്നുന്നു.രണ്ടു ഡോസും എടുത്തതാണങ്കിൽ നമ്മൾ ശ്രദ്ധിച്ചാൽ മതി മുത്തശ്ശാ. ഇവിടെ അമേരിക്കയിൽ വീട്ടിലിരുന്നു നമുക്ക് തന്നെ ടെസ്റ്റ് ചെയ്യാവുന്ന കിറ്റ് കിട്ടും. സംശയം തോന്നിയാൽ നമുക്ക് സ്വയം ചെക്കു ചെയ്യാം. പോസിറ്റീവ് ആണങ്കിലും ആശുപത്രിയിലേയ്ക്ക് ഓടിപ്പോ കണ്ട കാര്യമൊന്നുമില്ല. നമ്മൾ ശ്രദ്ധിച്ചാൽ മതി. അച്ചൂന് രണ്ടു ഡോസും ബൂസ്റ്റർ ഡോസും എടുത്തതാണ്. എന്നിട്ടും അച്ചൂന് ഒരു ചെറിയ ജലദോഷം വന്നപ്പോൾ ചെക്കു ചെയ്തു.. അച്ചൂന് കൊറോണ. മുത്തശ്ശൻ പേടിച്ചു.പേടിയ്ക്കണ്ട മുത്തശ്ശാ അച്ചു മുകളിലത്തെ നിലയിൽ ഒറ്റയ്ക്ക് കഴിയാൻ തീരുമാനിച്ചു.അച്ഛനോ അമ്മയോ രാത്രി കൂടെ കിടക്കാമെന്നു പറഞ്ഞതാ.അച്ചു സമ്മതിച്ചില്ല.അവർക്ക് പകരാൻ പാടില്ല. നമ്മൾക്വാറൻറ്റയിൻ ഇരിക്കുന്നത് ബാക്കിയുള്ളവർക്ക് വേണ്ടിയാണ്. അച്ചൂന് ആദ്യം ചെറിയ വിഷമം തോന്നി. പക്ഷേ പേടി തോന്നിയില്ല ഒട്ടും. സ്കൂളിൽ അച്ചുതന്നെയാ അറിയിച്ചേ. എനിയ്ക്ക് ആഹാരം അമ്മ റൂമിൽ എത്തിച്ചു തരും. കഴിച്ചിട്ട് ഞാൻ പാത്രം തന്നെ കഴുകി വയ്ക്കും. അച്ചൂന് യോഗയ്ക്കും, വായനയ്ക്കും, പOനത്തിനും ഒരു പാട് സമയം കിട്ടി. ഇപ്പഴാണറിയുന്നത് എന്തുമാത്രം സമയമാണ് നമ്മൾ വെറുതേ കളഞ്ഞിരുന്നതെന്നു് ആകെ ഒരു സങ്കടം പാച്ചുവിൻ്റെ കാര്യമോർക്കുമ്പോഴാണ്. അവനെ ഒത്തിരി മിസ് ചെയ്യുന്നു മുത്തശ്ശാ. അച്ചൂ നെക്കാൾ സങ്കടം അവനാണന്നു തോന്നി. ഡോറിൽ വന്നു നോക്കി നിൽക്കും. കുറച്ചു കഴിയുമ്പോൾ അവൻ്റെ കണ്ണു നിറയും. സങ്കടം വന്നാൽ അവൻ അഗ്രസീവാകുകയാണ് പതിവ്. പക്ഷേ അവൻ്റെ വികൃതിയും ചിരിയും കളിയും എല്ലാം നിന്നു. സാരമില്ല ടോ ഏട്ടൻ ഏഴുദിവസം കഴിഞ്ഞാൽ കളിയ്ക്കാൽ വരില്ലേ? അച്ചൂ നും സങ്കടം വന്നു മുത്തശ്ശാ.