നാലുകെട്ട്

നിളയുടെ പ്രതികാരം [കീ ശക്കഥ-41]

       സർവ്വതന്ത്ര സ്വതന്ത്രരായി ഓടി നടന്ന് എത്ര കാലം നിങ്ങളെ സേവിച്ചതാണ് ഞങ്ങൾ,. എത്ര സംസ്കാരങ്ങളാണ് നമ്മുടെ തീരങ്ങളിൽ രൂപപ്പെട്ട് നിങ്ങളെ സമ്പന്നമാക്കിയത്. എത്ര സന്തോഷകരമായിരുന്ന ആ പഴയ കാലം. അവസാനം ആർത്തി പിടിച്ച് കയ്യേറി നിങ്ങൾ ഞങ്ങളെ നശിപ്പിച്ചു,.മാലിന്യങ്ങൾ തള്ളാനുള്ള ഇടമാക്കി ഞങ്ങളെ മാറ്റി. എന്റെ ഒഴുക്ക് തടസപ്പെടുത്തി വലിയ ഡാമുകളും തടയിണകളും നിങ്ങൾ കെട്ടിപ്പൊക്കി,.അങ്ങിനെ ശുഷ്ക്കമായ ഞങ്ങളെ ഫ്ലാറ്റുകളും., റിസോർട്ടുകളും ഉയർത്തി ഞങ്ങളെ ഞരുക്കി,.ഞങ്ങളിൽപ്പലരും നിങ്ങളുടെ ക്രൂരമായ അധിനിവേശത്തിൽ ഈ ഭൂമുഖത്തു നിന്നും തുടച്ചു നീക്കപ്പെട്ടു. ആരും ഞങ്ങൾക്ക് വേണ്ടി ഒന്നും ചെയ്തില്ല.ചിലർ കവിത രചിച്ച് പാടി നടന്ന തൊഴിച്ചാൽ ഒരു ചെറുവിരൽ പോലും അനക്കിയില്ല.

         ഒരിക്കൽ ഞങ്ങൾ തിരിച്ചുവരും. അന്നു ഞങ്ങൾ തിരിച്ചടിക്കും. അത് അധിനിവേശക്കാർക്കുള്ള മുന്നറിയിപ്പായിരുന്നു,.അതും നിങ്ങൾ ചെവിക്കൊണ്ടില്ല.അഹങ്കാരികളായ നിങ്ങൾ ഞങ്ങളുടെ ശക്തിയെക്കുറച്ചു കണ്ടു,. ഇന്ന് ആ ദിവസം വന്നിരിക്കുന്നു. അടിമച്ചങ്ങല പൊട്ടിച്ചെറിയാനുള്ള അവസരം. ദൈവമായിട്ടു തന്നതാണ്. മഴ മേഘങ്ങളേ നന്ദി.

      ഞങ്ങളെ സ്വതന്ത്രമാക്കാൻ നിങ്ങൾ നിർബ്ബന്ധിതമായതാണന്നു ഞങ്ങൾക്കറിയാം.എല്ലാ തടവറകളും ഒരിക്കൽ തകരും, തകർക്കും അത് കാവ്യനീതി, ലോക നിയമം.കേരളത്തിൽ അങ്ങോളമിങ്ങോളം ഞങ്ങൾ തിരിച്ചടിക്കാൻ തയ്യാറായിരിക്കുന്നു. തടയാമെങ്കിൽ ഒന്നു ശ്രമിച്ച് നോക്കു.ഞങ്ങൾക്ക് നഷ്ടപ്പെട്ടതു മുഴുവൻ ഞങ്ങൾ തിരിച്ചുപിടിക്കും. പലിശ സഹിതം. അധിനിവേശങ്ങൾ എല്ലാം ഞങ്ങൾ ഒഴിപ്പിക്കും. ഇതുകൊണ്ടൊക്കെ ഒരു പാഠം പഠിച്ചാൽ നിങ്ങൾക്ക് നല്ലത്.ഈ പ്രചണ്ഡ പ്രതികാരത്തിൽ നിരപരാധികൾ പെട്ടുവെന്നതിൽ ദുഖമുണ്ട്. ഇനിയും ഭഗീരഥ മഹാരാജാക്കന്മാർ ഇവിടെ ഉണ്ടാകട്ടെ. ഞങ്ങളുടെ സാമിപ്യത്തിന്റെ അനിവാര്യത നിങ്ങൾ മനസിലാക്കട്ടെ. അതിനായി എല്ലാവരുടേയും, ഈ ഭൂമിയുടെ തന്നെയും നന്മക്കാവട്ടെ ഈ ഷോക്ക് ട്രീറ്റ്മെന്റ്.